يابو سعد صارت على اخوك غارات = شهرين اقاسي من شديـد الغرابيـل
سو المرض يحمل على اخوك حملات = مافي يدي حيله ولا في يـدي حيـل
والله فزع من فوق سبع السمـاوات = وانا احمد الله يوم صارت تساهيـل
ماينفع الخايـف والايـام عجـلات = الخوف ماينفع ولا القـول والقيـل
حنا هـل العوجـا ولا بـه مـروات = شرب المصايب مثل شرب الفناجيـل
لاشك انا مشغول في كـل الاوقـات = على الـذي حنـا بظلـه رجاجيـل
ماني على نفسي كثيـر الحسافـات = لاسلم راسه روسنا رفـاع بالحيـل
حامي حمانـا بالليالـي المخيفـات = لو صـار بالعالـم كثيـر الزلايـل
فخر العروبـه بالعـدل والمسـاواه = هذاك هو فيصـل ولا فيـه تشكيـل
يشهد له اللي شاهدوا منـه ليـات = ويشهد له التاريخ جيل بعـد جيـل

يامرحبـا بكتـاب زبـن المـخـلات = اهـلا هلابـه عـد وبـل الهماليـل
حمدت مـن زال الكـدر بالمسـرات = فكاك مـن صكـت عليـه المحابيـل
فـزع لـك اللـي عالـم بالخفيـات = مبري جروح ايوب غيـث المراميـل
لعل مايزعج علـى فقـدك اصـوات = ولعلها لـك يابـو فيصـل تماهيـل
الله يجيرك مـن صواديـف الافـات = عسـاك تسلـم ياعشيـر المشاكيـل
ماانت برخيـص ياربيـع القرابـات = لو هي بالايدي كان دونـك حلاحيـل
ترا لنا بـك يافتـى الجـود هقـوات = في وقتنا الحاضـر وباللـي مقابيـل
يفـداك ربـع قصـروا بالمهـمـات = اللي على القـالات ماتنطـح الشيـل
بعض العرب حي ومن عرض الاموات = مايرتجـي نفعـه بحـل المشاكيـل
وفيصل ذرانـا بالسنيـن المخيفـات = هو درعنا الضافي الى ضدنـا الميـل
اللـي نقـل عنـا حمـول ثقيـلات = راس الحصيـل ان كملـن الحصيـل